തിരുവനന്തപുരം: സംസ്ഥാനത്ത് ഇന്നും കനത്ത മഴയ്ക്ക്
സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം വ്യക്തമാക്കി. മഴ കണക്കിലെടുത്ത്
കോഴിക്കോട്, വയനാട്
ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി നല്കി. നിലവില് ഈ
ജില്ലകളില് റെഡ് അലര്ട്ടാണ്. നേഴ്സറി, പ്രൊഫഷണല് കോളജ്
ഉള്പ്പടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ഇന്ന് അവധിയായിരിക്കുമെന്ന്
ജില്ലാ കളക്ടര് അറിയിച്ചു. ആലപ്പുഴ മുതല് കാസര്കോട് വരെയുള്ള 11 ജില്ലകളില് ഇന്ന് യെല്ലോ അലര്ട്ടാണുള്ളത്. പരക്കെ മഴക്കും ഒറ്റപ്പെട്ട
ശക്തമായ മഴക്കും സാധ്യതയുണ്ട്. കഴിഞ്ഞ 24 മണിക്കൂറില്
വയനാട് ജില്ലയിലെ വൈത്തിരിയിലാണ് ഏറ്റവും കൂടുതല്മഴ രേഖപ്പെടുത്തിയത്, 123 മില്ലീ മീറ്റര്. വയനാട് ജില്ലയില് ഇന്ന് റെഡ് അലര്ട്ട് പ്രഖ്യാപിച്ച
സാഹചര്യത്തില് പൊതുജനങ്ങള് ജാഗ്രത പാലിക്കണം. വയനാട് മണ്ണിടിച്ചിലിന്റെ
പശ്ചാത്തലത്തില് എല്ലാ ജില്ലകളിലും അതീവ ജാഗ്രതപാലിക്കാനാണ് സര്ക്കാര് നിര്ദേശം.
പുഴയിലോ, വെള്ളക്കെട്ടിലോ കുളിക്കാന് ഉള്പ്പെടെ ഇറങ്ങാന്
പാടുള്ളതല്ല. ത്യാവശ്യമില്ലാത്ത യാത്രകള് ഒഴിവാക്കാന് ശ്രദ്ധിക്കണമെന്നും
കളക്ടര് അറിയിച്ചു. കോഴിക്കോട് ജില്ലയിലും കേന്ദ്ര കാലാവസ്ഥാ വകുപ്പ് ഇന്ന് റെഡ്
അലര്ട്ട് പ്രഖ്യാപിച്ചിട്ടുണ്ട്. ട്യൂഷന് സെന്ററുകള്,
മദ്രസകള്, പ്രൊഫഷണല് കോളേജുകള് ഉള്പ്പെടെയുള്ള എല്ലാ
വിദ്യാഭ്യാസ സ്ഥാപനങ്ങള്ക്കും അവധി ആയിരിക്കും. എന്നാല് യൂണിവേഴ്സിറ്റി
പരീക്ഷകള്, പിഎസ്സി പരീക്ഷകള് എന്നിവ മുന്കൂട്ടി
നിശ്ചയിച്ച പ്രകാരം മാറ്റമില്ലാതെ നടക്കും.