സിനിമ റിവ്യൂ ചെയ്യാൻ പണം ആവശ്യപ്പെട്ടുവെന്ന ആരോപണം; സോഷ്യൽമീഡിയയിൽ പൊട്ടിത്തെറിച്ച് അശ്വന്ത് കോക്ക്

നടൻ സുരേഷ് ഗോപിയുടെ മകൻ മാധവ് സുരേഷ് പ്രധാന വേഷത്തിലെത്തിയ 'അങ്കം അട്ടഹാസം' എന്ന ചിത്രത്തിന്റെ അണിയറപ്രവർത്തകർ ഉന്നയിച്ച സാമ്പത്തിക ആരോപണങ്ങൾക്ക് കടുത്ത ഭാഷയിൽ മറുപടിയുമായി പ്രമുഖ സിനിമാ റിവ്യൂവർ അശ്വന്ത് കോക്ക്. ചിത്രത്തിന് പോസിറ്റീവ് റിവ്യൂ നൽകാൻ അശ്വന്ത് കോക്ക് ഒരു ലക്ഷം രൂപ ആവശ്യപ്പെട്ടു എന്നായിരുന്നു കഴിഞ്ഞ ദിവസം ചിത്രത്തിന്റെ നിർമാതാവും അണിയറപ്രവർത്തകരും വാർത്താസമ്മേളനത്തിൽ ആരോപിച്ചത്. എന്നാൽ ഒരു ലക്ഷം രൂപ വാങ്ങാൻ മാത്രം ദാരിദ്ര്യവാസി പ്രകൃതക്കാരനല്ല താനെന്നും ആരോപണത്തിന് പിന്നിൽ വ്യക്തമായ തെളിവ് കാണിക്കാൻ വെല്ലുവിളിക്കുന്നുവെന്നും അശ്വന്ത് കോക്ക് വ്യക്തമാക്കി. 

താൻ പണം വാങ്ങിയാണ് റിവ്യൂ ചെയ്യുന്നതെന്ന് പറയുന്നവരുടെ അടിസ്ഥാനം എന്താണെന്ന് കോക്ക് ചോദിക്കുന്നു. നീയും നിന്റെ തന്തമാരും കൂടി പണം ചാക്കിൽ കെട്ടി കൊണ്ടുവന്ന് തന്റെ ഫ്ലാറ്റിലെ സെക്യൂരിറ്റിയുടെ കയ്യിൽ ഏൽപ്പിക്കുകയാണോ ചെയ്തത് എന്ന് അദ്ദേഹം പരിഹസിച്ചു. ഡിജിറ്റൽ ഇടപാടുകൾ നടക്കുന്ന ഈ കാലഘട്ടത്തിൽ ഓൺലൈൻ ട്രാൻസാക്ഷൻ വഴിയാണ് പണം കൈമാറിയതെങ്കിൽ എന്തുകൊണ്ട് അതിന്റെ തെളിവ് പുറത്തുവിടുന്നില്ലെന്നും അദ്ദേഹം ചോദ്യമുയർത്തി. തനിക്ക് ഒരൊറ്റ ബാങ്ക് അക്കൗണ്ട് മാത്രമാണുള്ളതെന്നും അത് പരിശോധിച്ചാൽ ആർക്കും സത്യം മനസ്സിലാകുമെന്നും അദ്ദേഹം കൂട്ടിച്ചേർത്തു.

 

പൊതുവെ ഇത്തരം വിവാദങ്ങളോട് പ്രതികരിക്കാറില്ലെങ്കിലും 'അങ്കം അട്ടഹാസം' സിനിമയുടെ നിർമാതാവ് പത്രസമ്മേളനത്തിൽ ഉന്നയിച്ച കള്ളം സഹിക്കാനാകാത്തതിനാലാണ് ഇപ്പോൾ പരസ്യമായി രംഗത്തെത്തിയതെന്ന് അശ്വന്ത് കോക്ക് പറഞ്ഞു. പ്രസ് മീറ്റിലിരുന്ന് താൻ ഒരു ലക്ഷം രൂപ ആവശ്യപ്പെട്ടു എന്ന് വിളിച്ചുപറഞ്ഞ താടിക്കാരനായ പ്രൊഡ്യൂസർ അതിനുള്ള തെളിവ് കാണിക്കണം. അത്രയേറെ മോശം സിനിമയാണ് അവർ നിർമ്മിച്ചു വെച്ചിരിക്കുന്നത്. 

തിയേറ്ററിലിരുന്ന് ആ സിനിമ കണ്ട് തീർത്ത അവസ്ഥ തനിക്ക് മാത്രമേ അറിയാവൂ എന്നും കോക്ക് തുറന്നടിച്ചു. അശ്വന്ത് കോക്ക് നേരിട്ടല്ല, അദ്ദേഹത്തിന്റെ ആളുകളാണ് പണം ആവശ്യപ്പെട്ട് തങ്ങളെ ബന്ധപ്പെട്ടതെന്ന നിർമാതാവിന്റെ വാദവും റിവ്യൂവർ പൂർണ്ണമായി തള്ളിപ്പറഞ്ഞു. തനിക്ക് വേണ്ടി സംസാരിക്കാൻ വേറെ ആളുകളൊന്നുമില്ലെന്നും താൻ തനിയെയാണ് കാര്യങ്ങൾ ചെയ്യുന്നതെന്നും കോക്ക് വ്യക്തമാക്കി. മറ്റുള്ളവരുടെ പണം വാങ്ങി ജീവിക്കേണ്ട സാഹചര്യം തനിക്കില്ലെന്നും ഇത്തരം ദാരിദ്ര്യവാസികളായ നിർമാതാക്കളുടെ ആരോപണങ്ങൾക്ക് യാതൊരു വിലയും നൽകുന്നില്ലെന്നും അദ്ദേഹം വ്യക്തമാക്കി.

സുരേഷ് ഗോപിയുടെ മകൻ മാധവ് സുരേഷ് വാർത്തകളിൽ വന്നിരുന്ന് താൻ ഒരു ലക്ഷം രൂപ വാങ്ങി എന്ന് പറയുന്നത് കേട്ടുവെന്നും അതിന് എവിടെയാണ് തെളിവുള്ളതെന്ന് വ്യക്തമാക്കണമെന്നും കോക്ക് ആവശ്യപ്പെട്ടു. ഒരാളുടെ കയ്യിൽ നിന്നും ഒരു കാലിച്ചായ പോലും വാങ്ങി കുടിക്കാത്ത വ്യക്തിയാണ് താൻ. മാധവ് സുരേഷിന് എവിടെ നിന്നാണ് താൻ പണം വാങ്ങി എന്നതിന് തെളിവ് ലഭിച്ചതെന്നും അത് പൊതുജനങ്ങൾക്ക് മുന്നിൽ കാണിക്കണമെന്നും അദ്ദേഹം ആവശ്യപ്പെട്ടു. എല്ലാവരും ഒരേ രാജ്യത്താണ് ജീവിക്കുന്നതെന്ന ബോധം വേണമെന്നും കോക്ക് ഓർമ്മിപ്പിച്ചു. 

മാധവ് സുരേഷിന്റെ അച്ഛനായ നടൻ സുരേഷ് ഗോപിയുടെ ഏറ്റവും വലിയ ആരാധകനായിരുന്നു ഒരുകാലത്ത് താനെന്ന് അശ്വന്ത് കോക്ക് വെളിപ്പെടുത്തി. സുരേഷ് ഗോപി തകർത്തഭിനയിച്ച 'ബഡാ ദോസ്ത്' ഉൾപ്പെടെയുള്ള സിനിമകൾ റിലീസ് ചെയ്ത ആദ്യ ദിവസം തന്നെ ആദ്യ ഷോ (ഫസ്റ്റ് ഡേ ഫസ്റ്റ് ഷോ) കണ്ട് കൈയടിച്ചവനാണ് താൻ. തനിക്കെതിരെ ഇത്തരം വിലകുറഞ്ഞ ആരോപണങ്ങൾ ഉന്നയിക്കാൻ മാധവിന് എങ്ങനെ ഉളുപ്പുവരുന്നുവെന്നും കോക്ക് തന്റെ പ്രതികരണത്തിൽ ചോദിക്കുന്നുണ്ട്.

 പണം വാങ്ങിയതിന് എന്തെങ്കിലും തരത്തിലുള്ള ഒരു തെളിവ് കാണിക്കാൻ അണിയറപ്രവർത്തകർക്ക് സാധിച്ചാൽ താൻ ഈ റിവ്യൂ പറയുന്ന പണി എന്നെന്നേക്കുമായി നിർത്തി വനവാസത്തിന് പോകാൻ തയ്യാറാണെന്ന് കോക്ക് പ്രഖ്യാപിച്ചു. തന്നെ കുടുക്കാൻ വേണ്ടി കള്ളത്താടിയും വെച്ച് നടക്കുന്നവർ ജാഗ്രതൈ എന്ന മുന്നറിയിപ്പും അദ്ദേഹം നൽകി. താൻ പണം വാങ്ങി ആളുകളെ പറ്റിക്കുന്നവനാണെങ്കിൽ കണ്ടെത്താൻ കേരള പോലീസ് ഇവിടെയുണ്ടെന്നും അവർ മണ്ടന്മാരല്ലെന്നും കോക്ക് ഓർമ്മിപ്പിച്ചു. 

 ചിത്രത്തിന്റെ സാമ്പത്തിക പരാജയത്തെക്കുറിച്ചും ചിത്രത്തിന്റെ ഗുണനിലവാരത്തെക്കുറിച്ചും കടുത്ത ഭാഷയിലാണ് റിവ്യൂവർ സംസാരിച്ചത്. ഒരു ലക്ഷം രൂപ വീതം കേരളത്തിലെ എല്ലാ ജനങ്ങൾക്കും വെറുതെ കൊടുത്താൽ പോലും ആരും തിയേറ്ററിൽ പോയി ഈ സിനിമ കാണില്ലെന്ന് അദ്ദേഹം പരിഹസിച്ചു. അത്രമേൽ പ്രേക്ഷകരെ ടോർച്ചർ ചെയ്യുന്ന സിനിമയാണിതെന്നും സിനിമയ്ക്ക് യോഗ്യതയില്ലാത്തത് കൊണ്ടാണ് ജനങ്ങൾ തിയേറ്ററിലേക്ക് വരാത്തതെന്നും അദ്ദേഹം വ്യക്തമാക്കി

 ഒരു ലക്ഷം രൂപ ചോദിക്കാൻ മാത്രം താൻ അധഃപതിച്ചിട്ടില്ലെന്നും അത്രയും തുക തന്റെ റേഞ്ചിന് പറ്റിയതല്ലെന്നും കോക്ക് അവകാശപ്പെട്ടു. ആരോപണം ഉന്നയിക്കുന്നവർക്ക് വേണമെങ്കിൽ ഒരു 15 ലക്ഷം രൂപയെന്ന് എങ്കിലും പറയാമായിരുന്നു. തനിക്ക് യൂട്യൂബിൽ നിന്നും ഗൂഗിളിൽ നിന്നും മാസം എത്ര ഡോളർ വരുമാനമായി ലഭിക്കുന്നുണ്ടെന്ന് ഈ രംഗത്ത് പ്രവർത്തിക്കുന്നവരോട് ചോദിച്ചാൽ മനസ്സിലാകും. തന്റെ റേഞ്ച് എന്താണെന്ന് മനസ്സിലാക്കണമെങ്കിൽ ഒറ്റ കോളിൽ ലഭ്യമാകുന്ന കേരളത്തിലെ മനുഷ്യരെ നോക്കിയാൽ മതിയെന്നും അദ്ദേഹം പറഞ്ഞു.

അച്ഛന്റെ ചെലവിൽ പുതിയ ജിടി ബൈക്കും വാങ്ങി അതിന്റെ ഇഎംഐയും അടച്ച് നടക്കുന്ന മാധവ് സുരേഷിന് ധ്യാൻ ശ്രീനിവാസനെ കണ്ട് പഠിക്കാൻ ഒട്ടനവധി കാര്യങ്ങളുണ്ടെന്ന് കോക്ക് ഉപദേശിച്ചു. താൻ എത്രയോ സിനിമകളുടെ പേരിൽ ധ്യാൻ ശ്രീനിവാസനെ വിമർശിച്ചിട്ടുണ്ട്. എന്നാൽ ഇന്നുവരെ ആ മനുഷ്യൻ തനിക്കെതിരെ ഒരു വാക്ക് പോലും മോശമായി പറഞ്ഞിട്ടില്ലെന്ന് മാത്രമല്ല, ഇപ്പോഴും തനിക്ക് മെസ്സേജ് അയക്കാറുമുണ്ട്. ധ്യാനിനെപ്പോലെയാകണമെങ്കിൽ മാധവ് നൂറ് ജന്മം ജനിച്ചാലും സാധിക്കില്ല, കാരണം ധ്യാൻ മഹാനായ ശ്രീനിവാസന്റെ മകനാണെന്നും അശ്വന്ത് കോക്ക് ഓർമ്മിപ്പിച്ചു. കേരളത്തിൽ എഫ്എഫ്സി (FFC) കൂട്ടായ്മ തുടങ്ങിയ ആളാണ് താനെന്നും ഇതിലും വലിയ സിനിമാക്കാർ ഇവിടെ പടം ഇറക്കിയിട്ടുണ്ടെന്നും വ്യക്തമാക്കിയ കോക്ക്, തനിക്കെതിരെ വ്യാജ ആരോപണം ഉന്നയിച്ച 'അങ്കം അട്ടഹാസം' ടീമിനെതിരെ നിയമപരമായി മുന്നോട്ട് പോകുമെന്നും ഉറപ്പിച്ചു പറഞ്ഞു.