'മോഹിനിയാട്ട'ത്തിനു ശേഷം സൈജു കുറുപ്പ് വീണ്ടും നായകനാകുന്നു; 'തൃശൂർ പൂരം' സംവിധായകൻ രാജേഷ് നായർ ഒരുക്കുന്ന ചിത്രം; 'ഹരിവരാസനം' ടൈറ്റിൽ പുറത്ത്

കൊച്ചി: തിയറ്ററുകളിൽ ബ്ലോക്ക്ബസ്റ്റർ വിജയം നേടിയ 'മോഹിനിയാട്ടം' എന്ന ചിത്രത്തിന് ശേഷം സൈജു കുറുപ്പ് വീണ്ടും നായകനാകുന്ന പുതിയ ബിഗ് ബഡ്ജറ്റ് ചിത്രത്തിന്റെ ടൈറ്റിൽ അണിയറപ്രവർത്തകർ പുറത്തുവിട്ടു. 'ഹരിവരാസനം' എന്നാണ് ചിത്രത്തിന് പേരിട്ടിരിക്കുന്നത്. മലയാളികൾക്ക് പ്രിയപ്പെട്ട നിരവധി മികവുറ്റ സിനിമകൾ സമ്മാനിച്ചിട്ടുള്ള അജിത് വിനായക ഫിലിംസിന്റെ ബാനറിൽ വിനായക അജിത് ആണ് ഈ ചിത്രം നിർമിക്കുന്നത്.

'സാൾട്ട് മാംഗോ ട്രീ', 'തൃശൂർ പൂരം' എന്നീ ജനപ്രിയ ചിത്രങ്ങൾക്ക് ശേഷം രാജേഷ് നായർ സംവിധാനം ചെയ്യുന്ന ചിത്രം കൂടിയാണിത്. ഡോ. അമ്പാടി കെ. ആണ് ചിത്രത്തിന്റെ രചന നിർവഹിക്കുന്നത്. സൈജു കുറുപ്പിനൊപ്പം തെന്നിന്ത്യയിലെ പ്രഗത്ഭരായ ഒരുപറ്റം താരങ്ങളും അണിനിരക്കുന്ന ചിത്രത്തിന്റെ പ്രീ-പ്രൊഡക്ഷൻ ജോലികൾ ഇപ്പോൾ അവസാന ഘട്ടത്തിലാണ്. ചിത്രത്തിന്റെ പ്രധാന ആകർഷണങ്ങളിലൊന്ന് തിരുവനന്തപുരത്തെ ചിത്രാഞ്ജലി സ്റ്റുഡിയോയിൽ ഈ സിനിമയ്ക്കായി ഒരുങ്ങുന്ന ശബരിമലയുടെ പടുകൂറ്റൻ സെറ്റാണ്. ഇതിന്റെ നിർമ്മാണ പ്രവർത്തനങ്ങൾ ഇപ്പോൾ ദ്രുതഗതിയിൽ പുരോഗമിക്കുകയാണ്

 സൂപ്പർഹിറ്റ് ചിത്രമായ 'മാളികപ്പുറ'ത്തിന് ശേഷം രഞ്ജിൻ രാജ് വീണ്ടും സംഗീത സംവിധാനം നിർവഹിക്കുന്ന ചിത്രം കൂടിയെന്ന പ്രത്യേകതയും 'ഹരിവരാസന'ത്തിനുണ്ട്. വരും ദിവസങ്ങളിൽ ചിത്രത്തിലെ മറ്റ് താരങ്ങളെക്കുറിച്ചുള്ള വിവരങ്ങൾ പുറത്തുവിടുമെന്ന് അണിയറപ്രവർത്തകർ അറിയിച്ചു. വരാനിരിക്കുന്ന ജൂലൈ മാസത്തിൽ തിരുവനന്തപുരത്ത് വെച്ച് ചിത്രത്തിന്റെ ചിത്രീകരണം ആരംഭിക്കാനാണ് നിശ്ചയിച്ചിരിക്കുന്നത്.