കസൗലിയിൽ വൻ കാട്ടുതീ; റോഡ് മാർഗ്ഗം എത്താനാകാത്ത മലനിരകൾ; രക്ഷകരായി വ്യോമസേന; സുഖ്ന തടാകത്തിൽ നിന്ന് വെള്ളമെത്തിച്ച് 'ബാംബി ബക്കറ്റ്' ഓപ്പറേഷൻ

ഷിംല: ഹിമാചൽ പ്രദേശിലെ സോലൻ ജില്ലയിലുള്ള പ്രമുഖ വിനോദസഞ്ചാര കേന്ദ്രമായ കസൗലിയിലെ വനമേഖലയിലുണ്ടായ കാട്ടുതീ അണയ്ക്കാൻ വ്യോമസേനയുടെ നേതൃത്വത്തിൽ നടന്ന വൻ രക്ഷാപ്രവർത്തനത്തിന് സോഷ്യൽ മീഡിയയുടെ കയ്യടി. കഴിഞ്ഞ ചൊവ്വാഴ്ച ഉച്ചയ്ക്ക് മൂന്ന് മണിയോടെയാണ് കസൗലിയിലെ മലനിരകളിൽ തീപിടിത്തമുണ്ടായത്. ശക്തമായ കാറ്റിൽ ഗിൽബെർട്ട് ട്രയൽ, അപ്പർ മാൾ മേഖലകളിലേക്ക് തീ അതിവേഗം പടരുകയായിരുന്നു. 15 മണിക്കൂറിലധികം വനമേഖലയെ വിഴുങ്ങി ആളിപ്പടർന്ന തീ നിയന്ത്രണവിധേയമാക്കാൻ സിവിൽ ഭരണകൂടത്തെ സഹായിക്കാനാണ് ഇന്ത്യൻ വ്യോമസേന രംഗത്തിറങ്ങിയത്. 

ദുർഘടമായ മലനിരകളിൽ വ്യോമസേന ഹെലികോപ്റ്ററുകൾ ഉപയോഗിച്ച് കൃത്യതയോടെ വെള്ളം കോരി ഒഴിക്കുന്നതിന്റെ ദൃശ്യങ്ങൾ വ്യോമസേന പുറത്തുവിട്ടു. കഠിനമായ സാഹചര്യങ്ങളിലും വനത്തിന്റെ കൂടുതൽ ആഴങ്ങളിലേക്ക് തീ പടരുന്നത് തടയാൻ വ്യോമസേനയുടെ സമയോചിതമായ ഇടപെടലിലൂടെ സാധിച്ചുവെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്തു. അപായങ്ങളോ ജീവഹാനിയോ ഒന്നും തന്നെ എവിടെയും റിപ്പോർട്ട് ചെയ്തിട്ടില്ലെന്നും എല്ലാ ഉദ്യോഗസ്ഥരും സുരക്ഷിതരാണെന്നും അധികൃതർ സ്ഥിരീകരിച്ചു. റോഡ് മാർഗ്ഗം ഫയർഫോഴ്‌സ് വാഹനങ്ങൾക്ക് എത്തിപ്പെടാൻ സാധിക്കാത്ത കുത്തനെയുള്ള മലനിരകളായതിനാലാണ് വ്യോമസേനയുടെ വ്യോമ സഹായം തേടിയത്. 

ഹെലികോപ്റ്ററുകളിൽ ഘടിപ്പിച്ച 'ബാംബി ബക്കറ്റ്' (ഹെലികോപ്റ്ററിന് താഴെ തൂക്കിയിടുന്ന പ്രത്യേക തരം മടക്കാവുന്ന വലിയ കണ്ടെയ്‌നർ) ഉപയോഗിച്ചാണ് തീ അണയ്ക്കാനുള്ള ശ്രമം നടത്തിയത്. സമീപത്തുള്ള സുഖ്ന തടാകത്തിൽ നിന്നാണ് ഹെലികോപ്റ്ററുകൾ ഈ ബക്കറ്റിൽ വെള്ളം കോരിയെടുത്തത്. ചൊവ്വാഴ്ച വൈകുന്നേരം 5 മണിക്ക് ആരംഭിച്ച ദൗത്യം കനത്ത ഇരുട്ടിനെപ്പോലും അവഗണിച്ച് രാത്രിയിലും തുടരുകയായിരുന്നു. ഇതിനോടകം 15-ലധികം തവണ ഹെലികോപ്റ്ററുകൾ മാറിമാറി പറന്ന് 40,000 ലിറ്ററിലധികം വെള്ളമാണ് കത്തിയെരിയുന്ന വനമേഖലയിലേക്ക് ഒഴിച്ചതെന്ന് വ്യോമസേന അറിയിച്ചു. 

വരണ്ട കാലാവസ്ഥയുള്ള സമയങ്ങളിൽ കസൗലിയിലും പരിസര പ്രദേശങ്ങളിലും കാട്ടുതീ സാധാരണയാണെങ്കിലും ഇത്തവണ വ്യോമസേനയുടെ ഇടപെടൽ വലിയ ദുരന്തം ഒഴിവാക്കി.വ്യോമസേന പുറത്തുവിട്ട രക്ഷാപ്രവർത്തനത്തിന്റെ വീഡിയോയ്ക്ക് താഴെ വലിയ രീതിയിലുള്ള പ്രശംസകളാണ് ഉയരുന്നത്.കസൗലി സന്ദർശിക്കാനെത്തിയ വിനോദസഞ്ചാരികൾ ഉൾപ്പെടെ നിരവധി പേർ വ്യോമസേനയ്ക്ക് നന്ദി അറിയിച്ചു. മേയ് 26 മുതൽ വ്യോമസേന ഹെലികോപ്റ്ററുകൾ വിശ്രമമില്ലാതെ പറന്ന് തീ അണയ്ക്കാൻ ശ്രമിക്കുന്നത് തങ്ങൾ നേരിട്ട് കാണുകയാണെന്ന് കസൗലിയിലുള്ള ഒരു സഞ്ചാരി കുറിച്ചു. ദുരന്തമുഖത്ത് സൈന്യം നടത്തുന്ന സ്വാർത്ഥതയില്ലാത്ത ഇത്തരം സേവനങ്ങൾക്ക് രാജ്യം ഒന്നടങ്കം നന്ദി പറയുകയാണെന്ന് മറ്റ് സോഷ്യൽ മീഡിയ ഉപയോക്താക്കളും പ്രതികരിച്ചു.