പ്ലേ ഓഫ് കണക്കുകളിൽ 'തലപുകഞ്ഞ്' ചെന്നൈ; ഹൈദരാബാദിനോട് തോറ്റതോടെ വഴി അടഞ്ഞു; ഇനി രക്ഷപ്പെടാൻ അത്ഭുതങ്ങൾ സംഭവിക്കണം

 

ചെന്നൈ: ഐപിഎല്ലിൽ സൺറൈസേഴ്‌സ് ഹൈദരാബാദിനോട് കഴിഞ്ഞ തിങ്കളാഴ്ച വഴങ്ങിയ ദയനീയ തോൽവി ചെന്നൈ സൂപ്പർ കിങ്‌സിന്റെ പ്ലേ ഓഫ് പ്രതീക്ഷകൾക്ക് കനത്ത തിരിച്ചടിയായി. നിലവിൽ 13 മത്സരങ്ങളിൽ നിന്ന് വെറും 12 പോയിന്റ് മാത്രമുള്ള ചെന്നൈയ്ക്ക് ലീഗ് ഘട്ടത്തിൽ ഇനി ഒരേയൊരു മത്സരം മാത്രമാണ് ബാക്കിയുള്ളത്. ആ മത്സരത്തിൽ ജയിച്ചാൽ പോലും പരമാവധി എത്താൻ കഴിയുന്നത് 14 പോയിന്റിൽ മാത്രമാണ്. മറ്റു ടീമുകളുടെ മത്സരഫലങ്ങൾ അനുകൂലമായില്ലെങ്കിൽ 14 പോയിന്റ് പ്ലേ ഓഫിലെത്താൻ ഒട്ടും തികയാതെ വരും

 

 റുതുരാജ് ഗെയ്‌ക്‌വാദ് നയിക്കുന്ന ചെന്നൈയ്ക്ക് ഇനി സ്വന്തം പ്രകടനം കൊണ്ട് മാത്രം പ്ലേ ഓഫിലേക്ക് വഴിതുറക്കാനാവില്ല. മറിച്ച് വലിയൊരു വിജയത്തോടൊപ്പം ഭാഗ്യത്തിന്റെ അകമ്പടിയും മറ്റു ടീമുകളുടെ പതനവും കൂടി അനിവാര്യമാണ്. ചെന്നൈയ്ക്ക് പ്ലേ ഓഫ് സാധ്യത നിലനിർത്തണമെങ്കിൽ വരാനിരിക്കുന്ന മേയ് 21 വ്യാഴാഴ്ച അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന ഗുജറാത്ത് ടൈറ്റൻസിനെതിരായ അവസാന ലീഗ് മത്സരം ജീവൻമരണ പോരാട്ടമാണ്. ഈ മത്സരത്തിൽ തോറ്റാൽ ചെന്നൈ 12 പോയിന്റിൽ ഒതുങ്ങുകയും ടൂർണമെന്റിൽ നിന്ന് ഔദ്യോഗികമായി പുറത്താവുകയും ചെയ്യും.

 

മറിച്ചാണെങ്കിൽ, അതായത് ജിടിക്കെതിരെ ജയിച്ചാൽ ചെന്നൈയ്ക്ക് 14 പോയിന്റാകും. എന്നാൽ അവിടെയും തീരുന്നില്ല കടമ്പകൾ. ഒരേ പോയിന്റിൽ ഒന്നിലധികം ടീമുകൾ എത്തുന്നതോടെ വലിയൊരു നെറ്റ് റൺറേറ്റ് യുദ്ധത്തിന് ഐപിഎൽ പോയിന്റ് ടേബിൾ സാക്ഷ്യം വഹിക്കും. അതുകൊണ്ടുതന്നെ, ഗുജറാത്തിനെതിരെ വെറുമൊരു ജയമല്ല, മറിച്ച് റൺറേറ്റ് കുത്തനെ ഉയർത്താൻ സഹായിക്കുന്ന വലിയൊരു മാർജിനിലുള്ള വിജയമാണ് ചെന്നൈയ്ക്ക് ആവശ്യം. ലഖ്‌നൗവിനോടും ഹൈദരാബാദിനോടും തോറ്റത് ചെന്നൈയുടെ റൺറേറ്റിനെ ബാധിച്ചിട്ടുണ്ട്. ചെന്നൈ 14 പോയിന്റിൽ ഫിനിഷ് ചെയ്യുമ്പോൾ, ആദ്യ മൂന്ന് സ്ഥാനങ്ങളിലുള്ള ടീമുകൾ ഒഴികെ മറ്റ് നാലാം സ്ഥാനത്തിനായി മത്സരിക്കുന്ന ടീമുകളാരും 14 പോയിന്റിന് മുകളിലേക്ക് കടക്കാൻ പാടില്ല. ചെന്നൈയുടെ പ്ലേ ഓഫ് സ്വപ്നങ്ങൾക്ക് നിലവിൽ ഏറ്റവും വലിയ ഭീഷണി ഉയർത്തുന്നത് പഞ്ചാബ് കിങ്‌സാണ്. മേയ് 23-ന് നടക്കുന്ന തങ്ങളുടെ അവസാന ലീഗ് മത്സരത്തിൽ ലഖ്‌നൗ സൂപ്പർ ജയന്റ്‌സിനോട് പഞ്ചാബ് പരാജയപ്പെട്ടാൽ മാത്രമേ അവർ 13 പോയിന്റിൽ ഒതുങ്ങുകയും ചെന്നൈയ്ക്ക് താഴെയാവുകയും ചെയ്യൂ. ഒപ്പം പോയിന്റ് പട്ടികയിൽ ചെന്നൈയ്ക്ക് ഒപ്പമുള്ള രാജസ്ഥാൻ റോയൽസ്, കൊൽക്കത്ത നൈറ്റ് റൈഡേഴ്‌സ്, ഡൽഹി ക്യാപിറ്റൽസ് എന്നീ ടീമുകൾ വരും മത്സരങ്ങളിൽ തോൽക്കുകയും 14 പോയിന്റിലോ അതിൽ താഴെയോ ആയി ചുരുങ്ങുകയും വേണം. നിലവിൽ രണ്ട് മത്സരങ്ങൾ വീതം ബാക്കിയുള്ള രാജസ്ഥാന് 12 പോയിന്റും കൊൽക്കത്തയ്ക്ക് 11 പോയിന്റുമുണ്ട്. ഇതിൽ രാജസ്ഥാൻ 16 പോയിന്റിലേക്കോ കൊൽക്കത്ത 15 പോയിന്റിലേക്കോ കടന്നാൽ ചെന്നൈയുടെ പ്ലേ ഓഫ് വാതിലുകൾ എന്നെന്നേക്കുമായി അടയും. ചുരുക്കത്തിൽ, ഗുജറാത്തിനെതിരെയുള്ള തങ്ങളുടെ അവസാന മത്സരത്തിൽ ചെന്നൈയ്ക്ക് വമ്പൻ വിജയം അനിവാര്യമാണ്. ഒപ്പം രാജസ്ഥാനും കൊൽക്കത്തയും ഡൽഹിയും കനത്ത തോൽവികൾ വഴങ്ങി 14 പോയിന്റിൽ ടൈ ആവുകയും വേണം. അങ്ങനെ വന്നാൽ മാത്രമേ മികച്ച റൺറേറ്റിന്റെ ബലത്തിൽ ചെന്നൈയ്ക്ക് നാലാം സ്ഥാനക്കാരായി പ്ലേ ഓഫിലേക്ക് വണ്ടികയറാൻ സാധിക്കൂ.