തിരുവനന്തപുരം: കേരളത്തില് യുഡിഎഫ് സര്ക്കാര് അധികാരത്തിലേറി മന്ത്രിസഭാ രൂപീകരണം പ്രൗഢമായി പൂര്ത്തിയായതിന് പിന്നാലെ, സംസ്ഥാന കോണ്ഗ്രസിനെ അടിമുടി മാറ്റുന്നതിനുള്ള അഴിച്ചുപണി ചര്ച്ചകള്ക്ക് ഡല്ഹിയില് തുടക്കമായി. കെപിസിസി പ്രസിഡന്റും യൂത്ത് കോണ്ഗ്രസ് അധ്യക്ഷനും ഉള്പ്പെടെയുള്ളവര് പുതിയ മന്ത്രിസഭയില് അംഗങ്ങളായതോടെയാണ് സംഘടനയെ നയിക്കാന് പുതിയ യോദ്ധാക്കളെ തേടിയുള്ള ചരടുവലികള് സജീവമായത്. മുഖ്യമന്ത്രി പദവിയെച്ചൊല്ലി കോണ്ഗ്രസിനുള്ളില് ഉടലെടുത്ത വടംവലിയുടെയും ഗ്രൂപ്പ് പോരുകളുടെയും മുറിവുകള് ഉണങ്ങും മുന്പേയാണ് അടുത്ത അധികാരകേന്ദ്രത്തിനായുള്ള തര്ക്കം മുറുകുന്നത്. മുഖ്യമന്ത്രിയായ ശേഷം ആദ്യമായി ഡല്ഹിയിലെത്തിയ വി.ഡി. സതീശന് നടത്തുന്ന കൂടിക്കാഴ്ചകളില് കെപിസിസി അമരക്കാരന് ആരാകുമെന്നതില് നിര്ണ്ണായക തീരുമാനമുണ്ടാകും.
ഭരണ നേതൃത്വവും സംഘടനാ നേതൃത്വവും തമ്മില് യാതൊരുവിധത്തിലുള്ള പരസ്യപ്പോരും ഉണ്ടാകരുതെന്ന കര്ശന നിര്ദ്ദേശമാണ് ഇത്തവണ ഹൈക്കമാണ്ട് മുന്നോട്ടുവെക്കുന്നത്. മുന്പ് ഉമ്മന്ചാണ്ടി സര്ക്കാരിന്റെ കാലത്തും പിണറായി സര്ക്കാരിന്റെ കാലത്തും ഭരണവും സംഘടനയും തമ്മിലുണ്ടായ തര്ക്കങ്ങള് പാര്ട്ടികള്ക്ക് വരുത്തിവെച്ച വിന ചെറുതല്ല. അതുകൊണ്ടുതന്നെ പുതിയ മുഖ്യമന്ത്രിയായ വി.ഡി. സതീശനുമായി പൂര്ണ്ണമായി യോജിച്ചുപോകുന്നതും സര്ക്കാരിന്റെ പ്രതിച്ഛായ വര്ദ്ധിപ്പിക്കുന്നതുമായ ഒരു സാരഥിയെ കെപിസിസി അധ്യക്ഷ സ്ഥാനത്തേക്ക് കണ്ടെത്താനാണ് ഹൈക്കമാണ്ട് താല്പര്യപ്പെടുന്നത്. ഇവിടെയാണ് എഐസിസി ജനറല് സെക്രട്ടറി കെ.സി. വേണുഗോപാലിന്റെ പങ്ക് നിര്ണ്ണായകമാകുന്നത്. കേരളത്തിലെ പുനഃസംഘടനയില് ഹൈക്കമാണ്ടിന്റെ അന്തിമ തീരുമാനം വരാനിരിക്കെ, പന്ത് വീണ്ടും കെ.സിയുടെ കോര്ട്ടില് തന്നെയാണ് എത്തിനില്ക്കുന്നത്.
കെപിസിസി പ്രസിഡന്റായിരുന്ന സണ്ണി ജോസഫ്, വര്ക്കിങ് പ്രസിഡന്റുമാരായിരുന്ന എ.പി. അനില്കുമാര്, പി.സി. വിഷ്ണുനാഥ് എന്നിവര് സതീശന് മന്ത്രിസഭയില് മന്ത്രിമാരായതോടെ കെപിസിസി നേതൃത്വം നിലവില് പൂര്ണ്ണമായും ഒഴിഞ്ഞുകിടക്കുകയാണ്. ഇതിനൊപ്പം തന്നെ മന്ത്രിയായ യൂത്ത് കോണ്ഗ്രസ് സംസ്ഥാന പ്രസിഡന്റ് ഒ.ജെ. ജനീഷിനും പകരക്കാരനെ കണ്ടെത്തേണ്ടതുണ്ട്. ജനപ്രതിനിധികളായവര് പാര്ട്ടി ഭാരവാഹിത്വത്തില് തുടരേണ്ടതില്ലെന്ന 'ഒരാള്ക്ക് ഒരു പദവി' എന്ന കര്ശന മാനദണ്ഡം ഹൈക്കമാണ്ട് നടപ്പിലാക്കിയാല് നിലവിലുള്ള പല പ്രമുഖരും ലിസ്റ്റില് നിന്നും പുറത്താകും. ഈ സാഹചര്യത്തില് സംഘടനയെ അനാഥമായി വിടാന് കഴിയില്ലെന്ന ആക്രോശമാണ് താഴേത്തട്ടിലുള്ള അണികളില് നിന്നും ഉയരുന്നത്.
കെപിസിസി അധ്യക്ഷ പദവി ലക്ഷ്യമിട്ട് നിലവില് മൂന്ന് പ്രമുഖ നേതാക്കളാണ് ഹൈക്കമാണ്ടിന് മുന്നില് ശക്തമായ സമ്മര്ദ്ദം ചെലുത്തുന്നത്. മുന്പ് പലതവണ അധ്യക്ഷ സ്ഥാനത്തേക്ക് പരിഗണിക്കപ്പെടുകയും അവസാന നിമിഷം തഴയപ്പെടുകയും ചെയ്ത മുതിര്ന്ന നേതാവ് കൊടിക്കുന്നില് സുരേഷിനാണ് നിലവില് മുന്ഗണന കല്പ്പിക്കപ്പെടുന്നത്. കേരളത്തിലെ കോണ്ഗ്രസ് ചരിത്രത്തില് ഇതുവരെ പിന്നാക്ക-ദളിത് വിഭാഗങ്ങളില് നിന്നുള്ള ആരും കെപിസിസി പ്രസിഡന്റ് സ്ഥാനത്ത് വന്നിട്ടില്ലെന്ന ശക്തമായ രാഷ്ട്രീയ വാദമാണ് കൊടിക്കുന്നില് ഉന്നയിക്കുന്നത്. പദവി ഉറപ്പാക്കുന്നതിനായി അദ്ദേഹം ഇതിനകം തന്നെ ഡല്ഹി കേന്ദ്രീകരിച്ച് ഹൈക്കമാണ്ട് നേതാക്കളെ നേരില്ക്കണ്ട് ചര്ച്ചകള് നടത്തിക്കഴിഞ്ഞു.
അതേസമയം, ചാലക്കുടി എംപിയായ ബെന്നി ബഹനാനെ അധ്യക്ഷനാക്കണമെന്ന ആവശ്യവുമായി കോണ്ഗ്രസിലെ 'എ' വിഭാഗം ശക്തമായി രംഗത്തുണ്ട്. ഉമ്മന്ചാണ്ടിയുടെ കാലം മുതല് പാര്ട്ടിയെ പ്രതിസന്ധികളില് നയിച്ച പരിചയസമ്പത്താണ് ബെന്നി ബഹനാന് അനുകൂലമായി അവര് ചൂണ്ടിക്കാണിക്കുന്നത്. എന്നാല്, മറുവശത്ത് കെപിസിസി മുന് വക്താവും കടുത്ത നിലപാടുകാരനുമായ ജോസഫ് വാഴയ്ക്കനെ അധ്യക്ഷനാക്കണമെന്ന ആവശ്യവുമായി രമേശ് ചെന്നിത്തലയുടെ നേതൃത്വത്തിലുള്ള വിഭാഗവും ഡല്ഹിക്കു മേല് കടുത്ത സമ്മര്ദ്ദം ചെലുത്തുന്നുണ്ട്. മുന്പ് പല ഉന്നത പദവികളിലും പരിഗണിക്കാമെന്ന് ഉറപ്പ് നല്കിയിട്ടും തന്നെ തഴഞ്ഞതിലുള്ള കടുത്ത അമര്ഷം വാഴയ്ക്കന് നേതൃത്വത്തെ അറിയിച്ചിട്ടുണ്ട്. മുതിര്ന്ന നേതാക്കളായ കെ.സി. ജോസഫ്, ആന്റോ ആന്റണി എന്നിവരുടെ പേരുകള്ക്ക് പുറമെ യുവാക്കളുടെ പ്രതിനിധിയായി മാത്യു കുഴല്നാടന്, അടൂര് പ്രകാശ് എന്നിവരുടെ പേരുകളും പല കോണുകളില് നിന്നായി ഉയര്ന്നു കേള്ക്കുന്നുണ്ട്. ജനപ്രതിനിധികള് ഭാരവാഹികളാകേണ്ടെന്ന തീരുമാനം ഹൈക്കമാണ്ട് കര്ശനമാക്കിയാല് എംപിമാരായ കൊടിക്കുന്നില് സുരേഷും ബെന്നി ബഹനാനും കുഴല്നാടനും പട്ടികയില് നിന്ന് പുറത്താകും. അങ്ങനെ വന്നാല് പൂര്ണ്ണസമയ സംഘടനാ പ്രവര്ത്തകനായ ജോസഫ് വാഴയ്ക്കനോ കെ.സി. ജോസഫിനോ ഭാഗ്യം തുണച്ചേക്കും. ഡല്ഹിയില് നടക്കുന്ന ഹൈക്കമാണ്ട് ചര്ച്ചകളില് മുഖ്യമന്ത്രി വി.ഡി. സതീശന് നല്കുന്ന വ്യക്തിപരമായ നിര്ദ്ദേശങ്ങള് ഇതില് അതീവ നിര്ണ്ണായകമാകും.
കെപിസിസി പുനഃസംഘടനയ്ക്കൊപ്പം തന്നെ സംസ്ഥാനത്തെ ഏഴ് ഡിസിസി അധ്യക്ഷന്മാരെയും അടിയന്തരമായി മാറ്റാന് പാര്ട്ടി തീരുമാനിച്ചിട്ടുണ്ട്. തിരഞ്ഞെടുപ്പില് മത്സരിച്ച് എംഎല്എമാരായി മാറിയ ഡിസിസി അധ്യക്ഷന്മാര്ക്ക് പകരക്കാരെ കണ്ടെത്താത്തതിനാല് നിലവില് ഡിസിസി ഓഫീസുകള് നാഥനില്ലാ കളരിയായി മാറിയിരിക്കുകയാണ്. പാര്ട്ടി ഭരണം തിരിച്ചുപിടിച്ചിട്ടും സംഘടന ഇത്തരത്തില് നിശ്ചലമായി കിടക്കുന്നത് വരും ദിവസങ്ങളില് തദ്ദേശ തിരഞ്ഞെടുപ്പ് വരാനിരിക്കെ വലിയ തിരിച്ചടിയാകുമെന്ന വിമര്ശനം പാര്ട്ടിക്കുള്ളില് നിന്ന് തന്നെ ശക്തമാണ്. അതിനാല് ജംബോ കമ്മിറ്റികള് ഒഴിവാക്കി കെട്ടുറപ്പുള്ള പുതിയൊരു ടീമിനെയാണ് സതീശനും കെ.സി. വേണുഗോപാലും ലക്ഷ്യമിടുന്നത്.
മുഖ്യമന്ത്രിയായ ശേഷം ആദ്യമായി ഡല്ഹിയിലെത്തിയ വി.ഡി. സതീശന് കേരള ഹൗസില് വികാരനിര്ഭരവും പ്രൗഢവുമായ സ്വീകരണമാണ് ലഭിച്ചത്. വിദ്യാര്ത്ഥികളും കേരള ഹൗസ് ജീവനക്കാരും മുദ്രാവാക്യങ്ങള് ഉയര്ത്തിയും പടക്കം പൊട്ടിച്ചും മധുരം വിതരണം ചെയ്തുമാണ് പുതിയ മുഖ്യമന്ത്രിയെ വരവേറ്റത്. ഡല്ഹിയില് തുടരുന്ന സതീശന് ഇന്ന് സോണിയ ഗാന്ധി, രാഹുല് ഗാന്ധി, പ്രിയങ്ക ഗാന്ധി, എഐസിസി പ്രസിഡന്റ് മല്ലികാര്ജ്ജുന് ഖാര്ഗെ എന്നിവരുമായി പ്രത്യേക കൂടിക്കാഴ്ച നടത്തും. ഈ കൂടിക്കാഴ്ചകളില് കെപിസിസി പ്രസിഡന്റ് സ്ഥാനത്തെക്കുറിച്ചുള്ള അന്തിമ മാര്ഗ്ഗരേഖ തയ്യാറാകും.
യൂത്ത് കോണ്ഗ്രസ് അധ്യക്ഷ പദവിയിലേക്കും വന് ചരടുവലികളാണ് നടക്കുന്നത്. മന്ത്രിയായ ഒ.ജെ. ജനീഷിന് പകരം കെ.സി. വേണുഗോപാല് വിഭാഗത്തിനും വി.ഡി. സതീശന് വിഭാഗത്തിനും താല്പര്യമുള്ള യുവനേതാക്കളെ തിരുകിക്കയറ്റാന് അണിയറയില് മത്സരമുണ്ട്. പാര്ലമെന്ററി പാര്ട്ടിയില് തനിക്കുണ്ടായ മേല്ക്കൈ സംഘടനയിലും നിലനിര്ത്താനാണ് മുഖ്യമന്ത്രി സതീശന്റെ നീക്കം. എന്നാല് ആഭ്യന്തരവകുപ്പ് കൈയാളുന്ന രമേശ് ചെന്നിത്തലയും കേന്ദ്രത്തില് സ്വാധീനമുള്ള കെ.സി. വേണുഗോപാലും വിട്ടുവീഴ്ചയ്ക്ക് തയ്യാറാകാത്ത പക്ഷം പുനഃസംഘടന വീണ്ടും നീണ്ടുപോകാനും സാധ്യതയുണ്ട്.
സംസ്ഥാന
കോണ്ഗ്രസിലെ ഗ്രൂപ്പ് സമവാക്യങ്ങള് പൂര്ണ്ണമായി മാറിമറിഞ്ഞ സാഹചര്യത്തില്
ഹൈക്കമാണ്ടിന്റെ പ്രഖ്യാപനം എന്തായിരിക്കുമെന്നത് അണികളിലും വലിയ ആകാംക്ഷയാണ്
ഉണ്ടാക്കുന്നത്. വരും ദിവസങ്ങളില് തന്നെ ഡല്ഹിയില് നിന്നും കെപിസിസി, യൂത്ത് കോണ്ഗ്രസ് അധ്യക്ഷന്മാരുടെ കാര്യത്തില് അന്തിമ പ്രഖ്യാപനം
ഉണ്ടായേക്കും. ഭരണത്തില് അഴിമതി വിരുദ്ധ പോരാട്ടങ്ങളുമായി മുന്നോട്ട് പോകുന്ന
യുഡിഎഫ് സര്ക്കാരിന് കരുത്തുറ്റ ഒരു സംഘടനാ സംവിധാനം കൂടി ഒപ്പമുണ്ടായാല്
മാത്രമേ അടുത്ത അഞ്ച് വര്ഷം സുഗമമായി മുന്നോട്ട് പോകാന് കഴിയൂ എന്ന യാഥാര്ത്ഥ്യം
കോണ്ഗ്രസ് നേതൃത്വത്തിന് നന്നായറിയാം.