സാന്റോ ഡൊമിന്ഗോ:
ഡൊമിനിക്കന് റിപ്പബ്ലിക്കില് സ്വകാര്യ വിമാനം അടിയന്തരമായി
നിലത്തിറക്കുന്നതിനിടെയുണ്ടായ അപകടത്തില് രണ്ട് പേര് മരിച്ചു. അമേരിക്കയില്
രജിസ്റ്റര് ചെയ്ത ഗള്ഫ്സ്ട്രീം ജി200 എന്ന ആഡംബര സ്വകാര്യ ജെറ്റ് വിമാനമാണ് അപകടത്തില്പ്പെട്ടത്.
അമേരിക്കയിലെ ടെക്സസിലുള്ള ഓസ്റ്റിനിലേക്ക് പോവുകയായിരുന്ന വിമാനമാണ് ലാന്ഡിംഗിനിടെ
കത്തിയമര്ന്നത്. വിമാനത്തിന് ഗുരുതരമായ യാന്ത്രിക തകരാറുകള് സംഭവിച്ചതിനെത്തുടര്ന്ന്
അടിയന്തര ലാന്ഡിംഗിന് ശ്രമിക്കുകയായിരുന്നുവെന്ന് യു.എസ് മാധ്യമങ്ങള് റിപ്പോര്ട്ട്
ചെയ്തു.
യാത്രയ്ക്കിടയില്
വിമാനത്തില് സാങ്കേതിക തകരാറുകള് ശ്രദ്ധയില്പ്പെട്ടതിനെ തുടര്ന്ന് പൈലറ്റ്
അടിയന്തര ലാന്ഡിംഗിനായി അനുമതി തേടുകയായിരുന്നു. എന്നാല് റണ്വേയിലേക്ക് വിമാനം
എത്തിക്കുന്നതിനിടയില് നിയന്ത്രണം നഷ്ടമാവുകയും തീപിടിക്കുകയുമായിരുന്നു എന്നാണ്
പ്രാഥമിക വിവരം.അപകടം നടന്നയുടന് തന്നെ വിമാനത്താവളത്തിലെ രക്ഷാപ്രവര്ത്തകരും
അഗ്നിശമന സേനയും സ്ഥലത്തെത്തി തീയണയ്ക്കാനുള്ള ശ്രമങ്ങള് ആരംഭിച്ചു. എന്നാല്
വിമാനത്തിനുള്ളിലേക്ക് പടര്ന്ന തീയില്പ്പെട്ട് രണ്ട് പേര്ക്ക് ജീവന്
നഷ്ടമാവുകയായിരുന്നു. മരിച്ചവരെക്കുറിച്ചുള്ള കൂടുതല് വിവരങ്ങള് അധികൃതര്
പുറത്തുവിട്ടിട്ടില്ല.
അപകടസമയത്ത്
വിമാനത്തില് എത്ര യാത്രക്കാര് ഉണ്ടായിരുന്നു എന്നതിനെക്കുറിച്ചും വ്യക്തത
വന്നിട്ടില്ല. സംഭവത്തില് പരിക്കേറ്റ ചിലരെ അടുത്തുള്ള ആശുപത്രിയിലേക്ക്
മാറ്റിയിട്ടുണ്ട്. സാങ്കേതിക തകരാര് തന്നെയാണ് അപകടത്തിലേക്ക് നയിച്ചതെന്നാണ്
പ്രാഥമിക നിഗമനമെങ്കിലും, സംഭവത്തെക്കുറിച്ച് ഉന്നതതല അന്വേഷണത്തിന് ഡൊമിനിക്കന് റിപ്പബ്ലിക്
വ്യോമയാന മന്ത്രാലയം ഉത്തരവിട്ടിട്ടുണ്ട്. വിമാനത്തിന്റെ ബ്ലാക്ക് ബോക്സ്
കണ്ടെടുത്താലേ അപകടത്തിന്റെ യഥാര്ത്ഥ കാരണം വ്യക്തമാകൂ.
അമേരിക്കന്
വ്യോമയാന അധികൃതരും സംഭവത്തില് അന്വേഷണം പ്രഖ്യാപിച്ചിട്ടുണ്ട്. വിമാനത്തിന്റെ
സുരക്ഷാ മാനദണ്ഡങ്ങളിലും യാന്ത്രിക ക്ഷമതയിലും എന്തെങ്കിലും വീഴ്ചകള്
സംഭവിച്ചിട്ടുണ്ടോ എന്ന് പരിശോധിക്കുമെന്ന് അവര് അറിയിച്ചു. അപകടത്തെത്തുടര്ന്ന്
വിമാനത്താവളത്തിന്റെ പ്രവര്ത്തനം താത്കാലികമായി തടസ്സപ്പെട്ടു. റണ്വേയിലേക്ക്
ലാന്ഡ് ചെയ്യാനിരുന്ന മറ്റ് വിമാനങ്ങള് അടുത്തുള്ള മറ്റ് വിമാനത്താവളങ്ങളിലേക്ക്
തിരിച്ചുവിട്ടു. അടുത്തിടെയുണ്ടായ ഏറ്റവും ദൌര്ഭാഗ്യകരമായ
വിമാനാപകടങ്ങളിലൊന്നാണിതെന്ന് പ്രാദേശിക മാധ്യമങ്ങള് റിപ്പോര്ട്ട് ചെയ്തു.
ലാന്ഡിംഗിനിടെ
പൂര്ണ്ണമായും കത്തിയമര്ന്ന വിമാനത്തിന്റെ ദൃശ്യങ്ങള് സമൂഹമാധ്യമങ്ങളില് പ്രചരിക്കുന്നുണ്ട്.
വ്യോമയാന സുരക്ഷാ മാനദണ്ഡങ്ങള് കര്ശനമായി പാലിക്കേണ്ടതിന്റെ ആവശ്യകതയിലേക്കാണ്
ഈ അപകടം വിരല് ചൂണ്ടുന്നത്. സംഭവത്തില് ഡൊമിനിക്കന് റിപ്പബ്ലിക് ഭരണകൂടം
അനുശോചനം രേഖപ്പെടുത്തി.