പെട്ടെന്ന് ബോധം നഷ്ടപ്പെടുകയും കൈകാലുകള് വിറച്ച് അപസ്മാര ലക്ഷണങ്ങള് പ്രകടമാക്കുകയും ചെയ്ത യുവാവിന്റെ അവസ്ഥ കണ്ട് സഹയാത്രികര് ആകെ പരിഭ്രാന്തരായി. ഇതോടെ കാബിന് ക്രൂ വിമാനത്തിലെ അനൗണ്സ്മെന്റ് സിസ്റ്റത്തിലൂടെ അടിയന്തര സന്ദേശം പുറപ്പെടുവിച്ചു: 'വിമാനത്തില് ഡോക്ടര്മാരോ നഴ്സുമാരോ ഉണ്ടെങ്കില് ദയവായി മുന്നോട്ട് വരണം.' വിമാനത്തിന്റെ പിന്സീറ്റിലിരിക്കുകയായിരുന്ന അഖില ഈ ശബ്ദം കേട്ടയുടന് തന്റെ രണ്ടാമത്തെ മാത്രം വിമാനയാത്രയാണെന്ന ഭയമൊക്കെ മാറ്റിവെച്ച് ഒട്ടും മടിക്കാതെ രോഗിയുടെ അടുത്തേക്ക് ഓടിയെത്തുകയായിരുന്നു. അഖില രോഗിയുടെ അടുത്തെത്തുമ്പോള് അടിയന്തരമായി സംസാരിക്കാനോ വിളിച്ചാല് പ്രതികരിക്കാനോ ഉള്ള അവസ്ഥയിലായിരുന്നില്ല അയാള്. ശ്വാസമെടുക്കുന്നുണ്ടായിരുന്നെങ്കിലും ശരീരം അതിശക്തമായി വിറയ്ക്കാനും കൈകാലുകള് അനിയന്ത്രിതമായി ഇളകാനും തുടങ്ങിയിരുന്നു. യാത്രക്കാര് ഭയന്നുവിറച്ചെങ്കിലും വര്ഷങ്ങളുടെ പ്രൊഫഷണല് പരിചയസമ്പത്തുള്ള അഖില ശാന്തത കൈവിട്ടില്ല. വിമാനത്തിലുണ്ടായിരുന്ന മറ്റൊരു ഡോക്ടര് കൂടി സഹായത്തിനെത്തിയതോടെ, കൂടുതല് സ്ഥലസൗകര്യത്തിനായി രോഗിയെ വിമാനത്തിന്റെ മുന്ഭാഗത്തേക്ക് മാറ്റി അടിയന്തര പരിചരണം ആരംഭിച്ചു.
വിമാനത്തിനുള്ളിലെ പരിമിതമായ സാഹചര്യങ്ങള് അഖിലയ്ക്ക് വലിയ വെല്ലുവിളിയായിരുന്നു. രക്തത്തിലെ പഞ്ചസാരയുടെ അളവ് പരിശോധിക്കാനുള്ള ഗ്ലൂക്കോമീറ്റര് മെഷീന് പോലും വിമാനത്തില് ലഭ്യമായിരുന്നില്ല. എന്നാല് ലഭ്യമായ കുറഞ്ഞ സൗകര്യങ്ങള് വെച്ച് അഖില യുദ്ധകാലാടിസ്ഥാനത്തില് ചികിത്സ തുടങ്ങി. കൂടെയുണ്ടായിരുന്ന ഡോക്ടറുടെ നിര്ദ്ദേശപ്രകാരം ആകാശത്തെ വായുസഞ്ചാരം കുറഞ്ഞ അന്തരീക്ഷത്തിലും അതീവ ജാഗ്രതയോടെ അഖില രോഗിക്ക് ഐ.വി. ലൈന് ഇട്ടു. പള്സ് റേറ്റ് ക്രമാതീതമായി താഴുകയും രക്തസമ്മര്ദ്ദത്തില് കനത്ത വ്യതിയാനം വരികയും ചെയ്ത രോഗിയെ പുതപ്പുകൊണ്ട് നന്നായി മൂടുകയും കൈകാലുകള് തിരുമ്മി ചൂട് നിലനിര്ത്താന് ശ്രമിക്കുകയും ചെയ്തു. ഇലക്ട്രോലൈറ്റ് സപ്പോര്ട്ടും ഐ.വി. ഫ്ലൂയിഡുകളും കൃത്യസമയത്ത് നല്കിയതോടെ ഏകദേശം രണ്ട് മണിക്കൂര് നീണ്ട കഠിനമായ പ്രയത്നത്തിനൊടുവില് ആ യുവാവ് സാവധാനം ബോധം വീണ്ടെടുത്തു. ബോധം വന്ന രോഗിക്ക് അഖില തന്നെ ജ്യൂസ് നല്കി പരിചരിക്കുകയും ആരോഗ്യനില സ്ഥിരമാണെന്ന് ഉറപ്പുവരുത്തുകയും ചെയ്തു. പിന്നീട് അഖില തന്റെ സീറ്റിലേക്ക് മടങ്ങിയെങ്കിലും, രോഗിയോടുള്ള കരുതലോടെ വീണ്ടും വന്ന് 'ഇപ്പോള് എങ്ങനെയുണ്ട് സഹോദരാ?' എന്ന് തമിഴില് അന്വേഷിച്ചു. ഒപ്പമുണ്ടായിരുന്ന മാലാഖയെ നന്ദിനിറഞ്ഞ കണ്ണുകളോടെ നോക്കി 'ഇപ്പോള് കുഴപ്പമില്ല സഹോദരി' എന്നായിരുന്നു അദ്ദേഹത്തിന്റെ മറുപടി. വിമാനം തിരുച്ചിറപ്പള്ളിയില് ലാന്ഡ് ചെയ്തയുടന് റണ്വേയില് കാത്തുനിന്നിരുന്ന അടിയന്തര മെഡിക്കല് സംഘത്തിന് രോഗിയെ സുരക്ഷിതമായി കൈമാറി. ആകാശത്തുണ്ടായ അടിയന്തര സാഹചര്യത്തില് ഒട്ടും പതറാതെ ഒരു പ്രവാസി സഹോദരന്റെ ജീവന് രക്ഷിച്ച അഖിലയ്ക്ക് എയര് ഇന്ത്യ എക്സ്പ്രസ്സ് അധികൃതര് വിമാനത്തിനുള്ളില് വെച്ച് തന്നെ കൈപ്പടയില് എഴുതിയ പ്രത്യേക പ്രശംസാപത്രവും ഉപഹാരവും നല്കി ആദരിച്ചു. അന്യന്റെ ജീവന് രക്ഷിക്കാന് സ്വന്തം തൊഴിലിന്റെ മഹത്വം ആകാശത്തോളമുയര്ത്തിയ അഖില ഓവിയന് നീലകണ്ഠനാണ് ഇപ്പോള് സോഷ്യല് മീഡിയയിലെ താരം. സ്വന്തം ജീവന്റെ കാവലാളായി മാറിയ അഖിലയ്ക്ക് ആ യുവാവിന്റെ കുടുംബവും പ്രവാസി ലോകവും ഒന്നടങ്കം നന്ദി പറയുകയാണ്. ഈ മാലാഖയ്ക്ക് ഒരു ബിഗ് സല്യൂട്ട്!
Tags:
International