ന്യൂയോര്ക്ക്:
ന്യൂയോര്ക്ക് മേയര് സൊഹ്റാന് മാംദാനിയുടെ സ്വപ്നപദ്ധതിയായ സൗജന്യ സാര്വത്രിക
ശിശുപരിചരണത്തിന് വന് സാമ്പത്തിക സഹായവുമായി ആമസോണ് സ്ഥാപകന് ജെഫ് ബെസോസിന്റെ
കുടുംബം. വാള്സ്ട്രീറ്റിലെ പ്രമുഖ സന്നദ്ധ സംഘടനയായ 'റോബിന് ഹുഡ്' വഴി 100 ദശലക്ഷം
ഡോളറാണ് (ഏകദേശം 830 കോടി രൂപ) ബെസോസിന്റെ മാതാപിതാക്കള്
കൈമാറിയത്. അതിസമ്പന്നര്ക്കെതിരെ കടുത്ത രാഷ്ട്രീയ നിലപാട് സ്വീകരിക്കുന്ന
മാംദാനിയുടെ ഭരണകൂടവും കോടീശ്വരന്മാരുടെ പിന്തുണയുള്ള സംഘടനയും തമ്മിലുള്ള ഈ
സഹകരണം കൗതുകകരമാണ്. ജെഫ് ബെസോസിന്റെ മാതാവ് ജാക്കി ബെസോസിന്റെ പേരില്
ആരംഭിക്കുന്ന എന്ഡോവ്മെന്റ് ഫണ്ട് വഴി നഗരത്തിലെ കുട്ടികളുടെ വിദ്യാഭ്യാസത്തിനും
വളര്ച്ചയ്ക്കുമാകും മുന്ഗണന നല്കുക. റോബിന് ഹുഡിന്റെ മുന് ബോര്ഡ് അംഗം
കൂടിയാണ് ജാക്കി. പ്രാഥമികമായി നല്കുന്ന 100 ദശലക്ഷം
ഡോളറിന് പുറമെ, മറ്റ് സ്രോതസ്സുകളില് നിന്ന് ലഭിക്കുന്ന
ഫണ്ടിന് ആനുപാതികമായി 25 ദശലക്ഷം ഡോളര് കൂടി കുടുംബം
വാഗ്ദാനം ചെയ്തിട്ടുണ്ട്. ഇതോടെ ആകെ സഹായം 150 ദശലക്ഷം
ഡോളറായി ഉയര്ന്നേക്കും.
നഗരത്തിലെ രണ്ട് വയസ്സുകാര്ക്ക് സൗജന്യ ശിശുപരിചരണവും പ്രീ-സ്കൂള്
വിദ്യാഭ്യാസവും ഉറപ്പാക്കുന്ന '2-കെ' പ്രോഗ്രാം
മാംദാനിയുടെ പ്രധാന തിരഞ്ഞെടുപ്പ് വാഗ്ദാനമായിരുന്നു. നഗരത്തിലെ സാമ്പത്തികമായി
പിന്നാക്കം നില്ക്കുന്ന കുടുംബങ്ങള്ക്ക് ഈ പദ്ധതി വലിയ ആശ്വാസമാകും.
ശതകോടീശ്വരന്മാര് നിലനില്ക്കേണ്ടതില്ലെന്ന് പ്രഖ്യാപിക്കുകയും ആഡംബര
നികുതിക്കായി വാദിക്കുകയും ചെയ്യുന്ന മാംദാനിക്ക്, പദ്ധതി
നടപ്പിലാക്കാന് ആവശ്യമായ ഭീമമായ തുക കണ്ടെത്താന് ഈ സഹായം വലിയ കരുത്താകും.
ശതകോടീശ്വരന് കെന് ഗ്രിഫിനുമായി വാഗ്വാദത്തില് ഏര്പ്പെടുകയും അതിസമ്പന്നരുടെ
മെറ്റ് ഗാല ചടങ്ങില് നിന്ന് വിട്ടുനില്ക്കുകയും ചെയ്ത മേയര് മാംദാനിയുടെ
നിലപാടുകള് വ്യവസായ ലോകത്ത് അസ്വസ്ഥത സൃഷ്ടിച്ചിരുന്നു. എന്നാല്, 12 ബില്യണ് ഡോളറിന്റെ ബജറ്റ് കമ്മി നേരിടുന്ന ന്യൂയോര്ക്കിന് ഇത്തരം
സംഭാവനകള് അനിവാര്യമാണെന്നാണ് സിറ്റി ഹാള് വക്താവ് ജെന ലൈല് വ്യക്തമാക്കുന്നത്.
ഗവണ്മെന്റും സന്നദ്ധ സംഘടനകളും കൈകോര്ത്താല് മാത്രമേ നഗരത്തിലെ മുഴുവന്
കുട്ടികള്ക്കും ഈ സേവനം എത്തിക്കാനാകൂ എന്ന് അവര് പറഞ്ഞു. 1988-ല് സ്ഥാപിതമായ റോബിന് ഹുഡ് ഫൗണ്ടേഷന്, മൈക്കല്
ബ്ലൂംബെര്ഗ് ഉള്പ്പെടെയുള്ള വാള്സ്ട്രീറ്റ് അതികായന്മാരുടെ പിന്തുണയോടെയാണ്
പ്രവര്ത്തിക്കുന്നത്. കോവിഡ് കാലത്തും ഭവനരഹിതര്ക്ക് വീട് നല്കുന്നതിലും നിര്ണ്ണായക
പങ്ക് വഹിച്ച ഈ സംഘടനയുമായി ചേര്ന്നാണ് മാംദാനി നഗരത്തിലെ മാതാപിതാക്കളുടെ
ആവശ്യങ്ങള് പഠിക്കാന് സര്വ്വേകള് നടത്തിയത്. ഈ സഹകരണം നഗരവികസനത്തിന് പുതിയ
വേഗം നല്കുമെന്ന് റോബിന് ഹുഡ് സിഇഒ റിച്ചാര്ഡ് ആര്. ബ്യൂറി ജൂനിയര് പറഞ്ഞു.